ایران آذربایجانی دیل و کولتور اوجاغی نین اساسنامه سی

1-- ایران آذربایجانی دیل و کولتور اوجاغی، ایران آذربایجانی نین دیلی و کولتورونو انکشاف ائتدیریب، ایره لی یه آپاران بیرتشکیلات دیر. ایران آذربایجانی دیل و کولتور اوجاغی، کانادانین یاسا لارینا گؤره قورولان و منفعت گودمیه ن بیر تشکیلات اولوب، مرکزی کانادانین تورونتو شهرینده دیر.

2 – اوجاق آشاغیداکی قوللاردان قورولوبدور:

قوروجو هئیات، قورولتای، مودورلر هئیاتی و کومیته لر.

تبصیره: یوخاریداکی قوللاردان باشقا، اوجاغین رسمی حسابچی سی واردیر.

3 -- قوروجوهئیاتی: " بیر ضرورته بیر مقدمه" نی، منشورو و اساسنامه نی حاضیرلایان و اونو عوموم مئدییا یولوایله عومومون اطللاعینا چاتدیران بیر گروه دور. آشاغیداکی وظیفه لر قوروجو هئیات ین عهده سینده اولوب، اونلاری یئرینه گتیردیک دن سونرا باشقا بیر رولو اولمایاجاقدیر.

3–1 بیر ضرورته بیر مقدمه، منشور و اساسنامه ایله موافق اولان هرکسی عوموم مئدییا یولو ایله قورولتایا چاغیرماق.

3-2 بیرینجی قورولتایی ییغماق.

3-3 قوروجولار هئیاتی نین راپورونو ایلک قورولتایا ارایه وئرمک.

4 -- قورولتای: اوجاغین ان یوکسک تمثیل اورگانی اولوب، هر ایل جلسه ده حاضیر عوضولرین ایشیراکی ایله رسمیت تاپار.

4-1 عادی قورولتای مودورلر هئیاتی، و فوق العاده قورولتای مودورلر هئیاتی یا دا عوضولرین اوچده- بیری نین چاغیریسی ایله تشکیل تاپار.

4-2 فوق العاده قورولتای "بیر ضرورته بیر مقدمه"، منشور و اساسنامه نی تغییر وئرمک یا دا، اوجاغی منحل ائتمک اوچون تشکیل تاپار و تصمیم لری حاضیر عوضولرین دؤرتده- اوچ رایی ایله قطعیت قازانار.

4-3 عادی قورولتایین وظیفه لری: مودورلر هئیاتی نین راپورونو آلماق، راپورو تصویب ائتمک، ایللیک بودجه نی تعیین ائتمک، مودورلر هئیاتی نی و حسابچی نی سئچمک و عوضولوک حقی نی تعیین ائتمک.

4-4 عادی و یا فوق العاده قورولتایا چاغیری، قورولتایین تشکیل تاریخیندن آزی آلتی هفته قاباقدان و گونده لیگین یازیلماغی شرطی ایله کتبا و هابئله عومومی نشریه لرده قئید شرطی ایله بوتون عوضولره اطلاع وئریلمه لیدیر. قورولتای گونده لیگینده قئید اولمایان موضوع لارین طرحی و تصویبی مجاز دئییل.

4-5 عادی قورولتایین تصمیم لری، حاضیر عوضولرین رای لرینین اکثریتی ایله تصویب اولونور.

4-6 اصلی عوضولرین هر بیرینین بیر رایی واردیر. جلسه ده اولمایان اصلی عوضو، رای وئرمه حاققینی باشقا بیر اصلی عوضوه وئره بیلیر. هئچ بیر عوضو بیرده ن آرتیق عوضوون وکالتی نی آلابیلمز.

5-- مودورلر هئیاتی: مودورلر هئیاتی بیر ایل مدت ایله قورولتای طرفیندن سئچیلن یئتدی اصلی عوضو و دؤرد یدک عوضو ایکی ایل اوچون سئچیلر. مودورلر هئیاتینه متوالی مکرر دفعه سئچیلمه سی آنجاق بیر دفعه مجاز دیر.

5- 1 مودورلر هئیاتی نین جلسه لری عوضولرین اکثریتی نین ایشتیراکی ایله رسمیت تاپار. اصلی عوضوون اؤلومو، ایستعفاسی یادا مودورلر هئیاتی نین دؤرد آردشیق جلسه سینده ایشتیراک ائتمه مه سی حالیندا یدک عوضولردن بیریسی قورولتایداکی رای چوخلوغو ترتیبی ایله مودورلر هئیاتی نه چاغریلار. آردیجیل دؤرد دفعه غیبتی اولان بیر عوضو مستعفی ساییلار.

5-2 مودورلر هئیاتی، اوجاغین ایشلرینی منشوردا و اساسنامه ده قئید اولونان اساس لارا و قورولتای لارین تصمیم لرینه گؤره اداره ائدر. اوجاغین ایشلری قارشی سیندا مودورلر هئیاتی عوضولرینین موشترک مسئولیتلری واردیر.

5-3 مودورلر هئیاتی ایلک جلسه سینده مودورلر هئیاتی عوضولریندن بیرینی مودورلر هئیتی نین باشچیسی، بیر نفری باشچی یاردیمجیسی و بیر نفری ده مالی ایشلر مسئولو اولاراق سئچر.

5-4 مودورلر هئیاتی نین باشچیسی، و اونون غیابیندا معاوینی، قورولتایین و مودورلر هئیاتی نین تصمیم لرینی یئرینه گتیرمک ایله مووظف اولوب، اوجاغین ایشلرینی دوزگون آپاریلماغینی تامین ائدر. مالی مسئول اوجاغین بوتون مالی اوراقینی و حساب کیتابینی تامین و اونلاری قوروماقلا مووظف دیر. مودورلر هئیاتی نین منشی سی، قورولتایین و مودورلر هئیاتی نین ییغینجاقلارینی صورت جلسه ائتمک له موکلف دیر.

5-5 مودورلر هئیاتی نین سایی سی، یدک عوضولرینی ده حسابا آلاراق بئش نفردن آشاغییا دوشسه، مودورلر هئیاتی نین قالان عوضولری یئنی مودورلر هئیاتی نی و یدک عوضولری سئچمک اوچون فوق العاده قورولتایی چاغیرمالیدیر.

5-6 مالی مسئولیته سبب اولان بوتون مقاوله، اسناد و موکاتیبه لر، مودورلر هئیاتی باشچی سینین و مالی مسئولون ایمضاسی ایله مومکون اولار. باشچی نین غییابیندا، معاوینی و مالی مسئولو و مالی مسئولون غییابیندا ایسه مودورلر هئیاتی نین ایکی عوضوونون ایمضاسی ایله اعتیبار قازانار.

5-7 اوجاغین اداری و گونلوک موکاتیبه لرینی، باشچی و اونون غییابیندا ایسه معاوینی ایمضالار.

5-8 قورولتایین و مودورلر هئیاتی نین تصمیم لری و موذاکره لرینین خولاصه سی تهیه اولونوب و قورونمالی دیر. عوضولر بو تصمیم و موذاکره لری گؤرمک حاققینا مالیک دیرلر.

5-9 مودورلر هئیاتی نین اصلی عوضولری، وظیفه لرینی گؤنوللو و قارشیلیق سیزجا یئرینه گتیررلر.

6-- کومیته لر: کومیته لر اوجاغین احتیاج لارینا گؤره، گؤنوللولردن و عوضولردن تشکیل تاپار. هر کومیته نین باشچی لیغی مودورلر هئیاتی عوضولرینین بیرسینین عؤهده سینده دیر.

6-1 کومیته لر مودورلر هئیاتی نظارتینده فعالیت آپارار.

6-2 کومیته لرین پروگرام، بودجه و فعالیتلری مدورلر هئیاتی نین ایختیار یندا دیر.

7 -- عوضو و عوضوولوق شرطلری:

اصلی عوضو:

7-1 یاش حددی آزی اون آلتی ایل

7-2 بیر ضرورته بیر مقدمه نی، منشورو و اساسنامه نی قبول ائتمک.

7-3 قورولتایین طرفیندن تعیین اولونان عوضوویت حاققینی وئرمک.

8 -- باغلی عوضولر: آذربایجانین دیل و کولتورونون ایره لی یه گئتمه سینه علاقه لی اولان فردلر و تشکیلاتلار، اوجاغا مالی یاردیملار چاتدیران فردلر و تشکیلاتلار، اوجاغین فعالیت لرینده ایشتیراک ائدیب اونون عوضوو اولماق ایستمه ینلر، اوجاغین باغلی عوضوو اولاراق تانینارلار. باغلی عوضولر قورولتایا قاتیلماق حاققینا صاحیب آنجاق رای وئره بیلمزلر.

9 -- فخری عوضولر: فخری عوضولر آذربایجانین دیل و کولتورونون ایره لی یه گئتمه سینده بؤیوک آددیملار آتمیش شخص لرین آراسیندان، مودورلر هئیاتی نین تشخیصی و قورولتایین تصویبی ایله سئچیلیرلر. فخری عوضولر قورولتایدا شرکت ائتدیکلرینده رای وئره بیلیرلر.

10 – عوضولرین حقوقو، عوضوویتین ایلغاسی و ترکی:

10-1 قورولتای قورولمامیشدان بیرآی اؤنجه، عضوولوک حاققینی وئره ن اصلی عوضولر، اوجاغین بوتون اورگانلاریندا سئچمک و سئچیلمک حاققلاری واردیر.

10-2 اوجاغین عوضولرینین عوضولوک ایلغاسی قورولتای و فوق العاده قورولتایین عؤهده سینده دیر.

10-3 عوضولوک ترکی یازیلی ایسته ک اولماسی حالیندا قبول اولونور.

11-- حسابچی: اوجاغین بوتون مالی حسابلاری هر ایل رسمی بیر حسابچی طرفیندن گؤرونملی دیر. اوجاغین حسابچی سی قورولتای طرفیندن سئچیلیر. مودورلر هئیاتی اوجاغین بوتون دفتر و حسابلارینی، حسابچی نین ایختیاریندا قویماقلا موکلف دیر. حسابچی، اوجاغین گؤرولموش حسابلاری باره ده بیر راپور حاضیرلاماغا و مودورلر هئیاتینه وئرمه یه مووظف دیر. مودورلر هئیاتی، مالی راپورت ایله بیرلیکده، مودورلر هئیاتی نین ایللیک فعالیتلرینین خولاصه سینی، مالی ایلین سونوندا، قورولتایدا عوضولرین اطلاعینا چاتدیرمالیدیر. مالی ایل ژانویه آیی نین بیریندن، دسامبر آیی نین سونوناجاقدیر.

12-- اوجاق، عوضولرینین لیست نی، اونلارین آدرسلری و تلفون نومره لرینی تهیه ائدر. بو لیست، تکجه مودورلر هئیاتی ایختیاریندا اولار و ساده جه عوضولرله ایرتیباط قورماق اوچون ایستیفاده اولونار.